Ahavuye isanamu, Reuters
- Umwanditsi, Frances Mao
- Igikorwa, BBC News
Perezida Vladimir Putin avuga ko Uburusiya bushobora gufata igitero gikozwe n’igihugu kidatunze ibirwanisho vya nikleyeri (canke ruhonyanganda vy’ubumara) gifashwe mu mugongo n’igitunze ibirwanisho vya nikleyeri nk'”igitero rusangi”.
Ibi bigashobora gufatwa ko ari nko kugabisha ko ashobora gukoresha ibiranisho vya nikleyeri muri Ukraine.
Mw’ijambo rikomeye yaraye ashikirije nijoro ku wa gatatu, uno mukuru w’igihugu c’Uburusiya avuga ko reta iriko irihweza ingene yohindura amategeko agenga ingene Uburusiya bushobora gukoresha ibirwanisho vyabwo vya nikleyeri.
Ukraine ni igihugu kidatunze ibirwanisho vya nikleyeri ariko gihabwa ubufasha bwa gisirikare na Reta Zunze Ubumwe za Amerika n’ibindi bihugu bitunze ibirwanisho vya nikleyeri.
Ashikirije ano majambo mu gihe Ukraine iriko irasaba uruhusha rwo gukoresha ibisasu vya misire biraswa kure ku bigo vya gisirikare vy’Uburusiya, ibisasu ihabwa n’ibihugu vy’uburengero.
Perezida Volodymyr Zelensky wa Ukraine ari mu rugendo muri Amerika muri ino ndwi bikaba bitegekanijwe ko abonana na Perezida Joe Biden ku mugwa mukuru Washington kuri uno wa kane, aho vyitezwe ko ibisabwa na Ukraine biza kuba biri mu bibazo nyamukuru baza kuganirako.
Ukraine yarinjiye ku butaka bw’Uburusiya muri uno mwaka ishaka gutera ibigo vyo hagati mu Burusiya ivuga ko birasa ibisasu vya misire muri Ukraine.
Yishura ku majambo ya Putin, umukuru w’ibiro vy’umukuru w’igihugu ca Ukraine Andriy Yermak avuga ko Uburusiya ata “kindi kintu bufise bwokoresha mu gutera ubwoba amakungu atari ibirwanisho vya nikleyeri”.
Imbere y’aha, Putin yari amaze kugabisha ko ashobora gukoresha ibirwanisho vya nikleyeri. Ukraine irabinegura, ikavuga ko ari “amayeri yo gukangisha ibirwanisho vya nikleyeri” mu ntumbero yo kurondera ingene incuti zayo zitobandanya ziyifata mu mugongo.
Ubushinwa, incuti y’Uburusiya, nabwo nyene busaba ituze, amakuru akavuga ko Perezida Xi Jinping yagabishije Putin kw’ikoreshwa ry’ibirwanisho vya nikleyeri.
Ariko ejo ku wa gatatu, amaze kuvugana n’Inama y’igihugu ijejwe umutekano, yatangaje iyi nteguro yo kwagura bikomeye aya mabwirizwa.
Agabisha ko amabwirizwa ngenderwako mashasha ya nikleyeri “yokwerekana neza ibisabwa kugira ngo Uburusiya bukoreshe ibirwanisho vya nikleyeri”, akavuga ko muri vyo harimwo ibitero vyokorwa ku Burusiya hakoreshejwe ibisasu bisanzwe vya misire.
Avuga ko Uburusiya buzokwihweza nimba “bwoshobora” gukoresha ibirwanisho vya nikleyeri buramutse bubonye ko hari igitero gikomeye c’ibisasu vya misire, indege z’intambara n’indege zitarimwo abaredera (drone) kigomorewe ku butaka bwabwo, kigashobora “guteza akaga gakomeye” ku busugire bw’igihugu.
Yongerako ati: “Hasabwe ko igitero ku Burusiya cokorwa n’igihugu kidatunze ibirwanisho vya nikleyeri, ariko harimwo uruhara canke ubufasha bw’igihugu gitunze ibirwanisho vya nikleyeri, cofatwa nk’igitero rusangi ku Burusiya”.
Uno mukuru w’igihugu c’Uburusiya avuga ko ibirwanisho vya nikleyeri vyabaye “kirumara mu gukomeza umutekano w’igihugu cacu n’abanyagihugu baco”.
Kuva intambara ya kabiri y’isi yose irangiye, ibihugu bitunze ibirwanisho vya nikleyeri vyabandanije poritike yo gukangana, yari ishingiye ku ciyumviro c’uko ari nka hamwe vyoshika ibihugu bishamiranye bikarasana hakoreshejwe ibirwanisho vya nikleyeri vyobiviramwo gusamburana.
Ariko kandi hari ibirwanisho vya nikleyeri bishobora gukoreshwa mu ntambara, ibi bikaba ari ibisasu vya misire bito bitekeye ibiturika vya nikleyeri bikoreshwa mu gusambura ibigo vy’umwansi bitarinze gusohora ubumara bworandagata.
Muri Ruheshi (6), Putin yaragabishije ibihugu bifashe mu mugongo Ukraine, avuga ko Uburusiya bufise “ibirwanisho vyinshi cane [vy’ubumara bishorora gukoreshwa mu ntambara] gusumba ibiri ku mugabane wa Bulaya, nubwo Amerika yozana ivyayo”.
Yongeyeko ati: “Ubulaya ntabwo bufise integuro iteye imbere [yo kwitabariza]. Kuri ivyo, nta bushobozi buhagije bufise bwo kwivuna”.
Ico gihe, yumvikanishije impinduka mu mategeko y’Uburusiya ajanye n’ikoreshwa ry’ibirwanisho vya nikleyeri – inyandiko zerekana ibisabwa kugira ngo bushobore gukoresha ibirwanisho ruhonyanganda vy’ubumara.