Liam Payne funeral: Pictures from private ceremony as One Direction stars join friends and family to say final goodbye to di musician – BBC News Pidgin

Flower tributes wey pipo carry come for di burial bin include one wey resemble 10 bowling pins and ball wey be one of Payne hobbies.

Na only small crowd of onlookers bin dey outside di church. Fans no too go di burial like dat bicos dem bin don tell demselves for di One Direction group for Reddit say, “memorials na for fans, funerals na for family”.

For one short statement afta im die, Payne family tok say, “we dey heartbroken. Liam go live forever for our heart and we go remember am for im kind, funny and brave soul.”

Autopsy confam say di 31-year-old bin suffer internal and external bleeding and get many traumatic injuries sake of di fall.

Payne na one of di popular names for pop afta e blow from The X Factor.

Even though im come third position for di show for 2010, One Direction become di biggest British group since The Beatles.

In dia five year career, dem sell 70 million records as dem get four UK number one singles and four number one albums.

Payne wey follow write plenti of dia hit songs also achieve success by imself with songs like Strip That Down and Bedroom Floor.

E dey survived by im parents, two sisters and Bear wey be im son wey im born wit Girls Aloud singer, Cheryl.