Ahavuye isanamu, Getty Images
- Umwanditsi, Jude Sheerin
- Igikorwa, BBC News, Washington DC
Umuraperi Jay-Z ariyamiriza ikirego c’uko we, ari kumwe na Sean “Diddy” Combs, bahaye ibiyayuramutwe umukobwa w’imyaka 13 bari mu birori bakamufata ku nguvu mu 2000.
Uno yitwaye, izina ryiwe rikaba ritashizwe ahabona, avuga ko yatewe mu nzu yariko iberamwo ibirori vyo gutanga ubushimwe, bwa MTV Video Music Awards (VMAs) i New York, kandi ko umugore w’icamamare atavuzwe izina yari muri ico cumba ico gihe.
Mw’itangazo, Jay-Z, izina ryiwe rikaba ari Shawn Carter, ariyamiriza uru rubanza akavuga ko ari ukugerageza kumutera ubwoba.
Diddy – we ubu asanzwe ari mw’ibohero aho arindiririye gucirirwa urubanza inyuma y’uko muri Nyakanga (9) yagirijwe ivyaha vy’ubucuruzi bw’abantu abatwara gusambanywa be n’ibindi vyaha – arahakana iki kirego gishasha.
Kugabisha: Iyi nkuru irimwo ibintu abasomyi bamwe boshobora gusanga bibabaza.
Uru rubanza rwugurujwe ubwa mbere muri Gitugutu (10), rusubira kwuguruzwa gushasha ku wa Mungu bashizwemwo izina rya Shawn Carter nk’uwuregwa.
BBC yegereye umushingwamanza wa Carter, Alex Spiro, n’uwujejwe kumwamamaza kugira bagire ico babivugako.
Iki kirego catanzwe n’umunyamategeko Tony Buzbee wo mu ntara ya Texas, hakurikijwe itegeko ry’i New York ry’ugukingira abakorewe ihohotera rishingiye ku gitsina.
Buzbee yaruguruje imanza zitari nke mu mezi aheze yagiriza Diddy ko yateye akongera agafa ku nguvu abagore – nubwo ata na rumwe ruvugwamwo amazina y’ababikorewe.
Uno munyamuziki wo mu mudiho wa hip-hop azocirirwa urubanza kw’igenekerezo rya 5 Rusama (5) umwaka uza.
Mw’itangazo yacishije ku mbuga hwaniro, Jay-Z agira ati: “Umushingwamanza wanje yararonse ikete ryo gutera ubwoba, ryitwa ikete ryo kubaza, rivuye ku munyamategeko yitwa Tony Buzbee.
“Ibiharuro yari yakoze bifatiye ku buremere bw’ibi birego hamwe n’ukungene abantu bashobora kumbona, maze bigatuma ndondera ingene vyohera.
“Oya nyakubahwa, ahubwo cabaye igihushane! Vyantumye nshaka kukugaragaza nk’umunyamanyanga. Oya ni ukuri, sinzoguha n’URUFARANGA NA RUMWE!!”
Jay-Z yongerako ko asanga ibi birego “vyuzuye inzigo kandi ndagusaba (wewe Tony Buzbee) ko wokwuguruza urubanza mpanavyaha, atari urubanza rwo kurondera indishi!! Umuntu uwo ari we wese yokora icaha nk’ico ku mwana akiri muto akwiye gupfungwa, ntavyo wokwemera?”
Itangazo ryasohowe n’abashingwamanza ba Combs rivuga ko uru rubanza rwasubiye kwugururwa gushasha ari ikindi kiri mu rukurikirane “rw’amatangazo y’ibiterasoni bifise intego yo gusokora amahera mu bantu b’ivyamamare batinya ko ibinyoma kuri bo vyokwirakwira, nk’uko nyene ibinyoma vyakwiragijwe kuri Mr Combs”.
Iri tangazo rivuga ko urubanza ruzokwerekana neza ko Combs ari umwere ku birego vyose yagirizwa. Ahanganye n’ibindi birego 30.
Mu kwishura ku vyo anegurwako, Buzbee yasohoye ifoto yiwe ku rubuga rwa Instagram ari umusore yambaye umwambaro wa gisirikare, n’amajambo ndondashusho avuga ko yatewe ubwoba mu twigoro two kumuzibira ngo ntiyuguruze urubanza.
Yanditse kandi ati: “Sinzokwemerera kandi umuntu uwo ari we wese azorondera gutera ubwoba abakiriya banje ngo bahore. Umuco w’izuba niwo muti nyawo wo kwica imigera kandi ndazi neza ko izuba ririko riza”.
Uwitwaye muri uru rubanza rwuguruwe ku wa Mungu, azwi gusa kw’izina rya “Jane Doe”, avuga ko mu 2000, igihe yari afise imyaka 13, umugenzi yamushikanye kuri VMAs ku kibanza c’ubutambiro, Radio City Music Hall, i Manhattan.
Uru rubanza ruvuga ko yegereye abashoferi b’imodoka ya limousine hanze y’iyo nyubakwa kugira ngo yinjire muri ivyo birori.
Ruvuga ko umushoreri umwe yamubwiye ko yahawe akazi na Combs, kandi ko yari “akwije ivyo Diddy yarondera”.
Ruvuga kandi ko ku mugoroba w’uyo musi umushoferi yamutwaye mu birori vyariko bibera mu nzu yera.
Ahavuye isanamu, Getty Images
Jane Doe avuga ko ashitse muri ivyo birori yasabwe gutera igikumu ku rwandiko, avuga ko rwari urw’amasezerano yo kutamena ibanga, nk’uko biri muri uru rubanza.
Ruvuga ko uno mukobwa yamenye “ivyamamare vyinshi” muri ivyo birori, yongera yibonera ingene banywa ibiyayuramutwe cane, harimwo na kokayine.
Umukozi yamuhaye ico anywa camutumye yumva “aborewe”, aca aja mu cumba araryama, nk’uko uru rubanza ruvuga.
Haciye akanya gato, nk’uko biri muri uru rubanza, Combs na Carter barinjiye muri ico cumba bari kumwe n’umukobwa w’icamamare, yiswe Icamamare B.
“Uno mukobwa yitwaye avuga ko yaciye amenya ibi vyamamare bitatu vyose “, nk’uko biri muri uru rubanza.
Ruvuga ko Diddy yamwegereye “afise amaso y’ubusazi”, aramufata amubwira ati: “Uriteguriye gukora ikirori!”
Jay-Z yaramugumije amusambanya ku nguvu, imbere y’uko Diddy na we amujako, vyose bikaba vyakorwa Icamamare B arorera, nk’uko biri muri uru rubanza.
Jane Doe yahavuye yirwanira igihe yariko asambanywa ku nguvu, abonye Diddy amuvuyeko yumiwe, aca aratumuka ariruka, nk’uko uru rubanza rubivuga.
Uru rubanza rurondera indishi itazwi, ruvuga ko uwitwaye agihanganye n’ihahamuka ry’ivyamubayeko n’umwikomo kubera ifatwa ku nguvu avuga ko yakorewe.
Mw’itangazo ryiwe, Carter asanzwe yubakanye na Beyoncé bakaba bafitaniye abana batatu, avuga ati: “Mbabajwe gusa n’umuryango wanje.
“Jewe n’umugore wanje tuzobwirizwa kwicarana n’abana bacu – umwe muri bo ubu akaba ari mu myaka y’aho abagenzi biwe bazobona ibiri mu binyamakuru hanyuma bamubaze ibibazo ku bijanye n’ibi birego – kugira ngo tubasigurire ububisha n’ubusuma vy’abantu”.