Xigashada Sawirka, Getty Images
Hambeegar ay sameyso shirkadda McDonald’s ayay dadka ku nool Mareykanka ku xanuunsadeen, sida laga soo xigtay Xarunta Cudurrada iyo Xakameynta iyo Kahortagga dalkaas (CDC).
E. coli, oo ah nooc ka mid ah bakteeriyada oo sababi karta xanuun saa’id oo dhanka caloosha ah, ayaa laga helay hambeegarka shirkaddan, sida ay sheegtay xarunta CDC.
Ilaa iyo haatan, CDC ayaa diwaangelisay 49 kiis oo xanuun ah oo 10 gobol laga soo sheegay. Toban kiis ayaa ka dhashay in bukaannada la geeyo isbitaal iyadoo hal qofna uu dhintay.
Inta badan kiisaska ayaa laga diwaan-geliyay gobollada galbeedka iyo galbeedka-dhexe, sida ay sheegtay CDC.
Shirkaddan sameysa cunnooyinka fudud ayaa la shaqeynaya baarayaasha si loo ogaado waxyaabaha ku jira ee sababay bakteeriyadan.
“McDonald’s ayaa joojiyay waxyaabahaas inay ku daraan hambeegarka, lagamana iibin doono gobollada qaar,” ayay tiri hay’adda.
“Weli lama yaqaanno sheyga gaarka ah ee sababay bakteeriyada,” ayay intaa raacisay CDC, iyadoo sheegtay in McDonald’s ay durba dhowr gobol “ka joojisay isticmaalka basal iyo waxyaabo laga sameeyay hilibka lo’da”.
Xarunta CDC ayaa sheegtay in basasha jarjaran ee diyaarsan la rumeysan yahay inay sababtay bakteeriyada, iyadoo baarayaasha Maamulka Cunnada iyo Dawooyinka (FDA) ay ka shaqeynayaan go’aansashada in basasha laga iibiyay shirkadaha ama maqaayadaha kale.
Weli wax tallaabo ah ma aysan qaadin CDC amaba saraakiisha waaxaha caafimaadka iyo cunnada.
Kiiskii ugu horreeyay ayaa la diwaan-geliyay 27-kii 27 September, sida ay sheegeen baarayaasha. Dhibbanayaasha ayay da’doodu u dhaxeysaa 13 ilaa 88.
Tobanka qof ee loo qaaday isbitaalka, hal qof ayaa waxaa la soo deristay xaalad halis ah oo sababi karta inay kilyuhu fadhiistaan.
Qof kale oo CDC ay ku sheegtay qof da’ ah oo ku noolaa gobolka Colorado ayaa geeriyooday kadib markii ay cuneen hambeegarka McDonald’s.
Kiisaska ayaa laga soo sheegay gobollada Colorado, Iowa, Kansas, Missouri, Montana, Nebraska, Oregon, Utah, Wisconsin iyo Wyoming.
Saamiyada McDonald’s ayaa hoos u dhacay ilaa 9% suuqa saamiyada ee New York kadib markii warkan uu soo baxay Talaadadii.
War, ay shrikadda McDonald’s soo saartay ayay ku sheegtay in baaritaan horudhac ah oo la sameeyay lagu ogaaday in qaar ka mid ah basasha jarjaran ee diyaarsan ay sababtay xanuunka laga qaaday hambeegarka.
Shirkadda oo xarunteedu tahay Chicago ayaa intaa ku dartay inay dhammaan maqaayadaha gudaha ku amartay in sheygan ay ka saaraan cunnooyinka ay iibiyaan waxayna joojisay in basasha jarjaran ee diyaarsan ay geeyaan gobolka.
Hambeegarka ayaa sidoo kale laga saaray liiska cunnooyinka ee dhowr gobol, sida ay shirkaddu sheegtay, iyadoo intaa raacisay: “Badqabka cunnada si adag ayaan u qaadaneynaa waana waxa saxda ah ee la sameyn lahaa.”
Waxyaabaha kale ee hilibka lo’da laga sameeyay ayaa weli kusii jira liiska cunooyinka, sida muuqaal uu soo duubay uu ku sheegay madaxweynaha McDonald’s ee Mareykanka Joe Erlinger.
“McDonald’s ahaan, waxaad nooga xisaabtami kartaan inaan sameyno waxa saxda ah,” ayuu yiri.
E. coli waa koox kala duwan oo bakteeriyo ah kuwaasoo caadi ahaan ku nool mindhicirrada bani’aadamka iyo xayawaannada.
Inkastoo qaar badan aysan wax dhib ah keenin, qaarkood ayaa soo saara sun aad ku xanuunsan karto.
Calaamadaha waxaa ka mid ah shuban-biyood daran oo mararka qaar dhiig wadata, calool-xanuun, mantag amaba qandho.
Caadi ahaan maalmo yar kadib marka bakteeriyadu ku asiibto ayay soo muuqdaan calaamadaha.
Ma aha markii ugu horreysay ee sanadahan bakteeriyada E. colilagu arko cunnooyinka McDonald’s.
Sanadkii 2022, lix carruur ah oo ku nool gobolka Alabama ayaa ku xanuunsaday E. coli kadib markii ay cuneen digaag.
Afar carruur ah ayaa isbitaalka la geeyay. Saraakiisha caafimaadka ayaa mar dambe booqday maqaayadda sameysay digaagga waxayna ogaadeen in shaqaalaha cunnada kariya aysan dhowrin sharciga iyagoo aan gacmaha si fiican isaga dhaqin isla markaana aysan gacma-gashi ama galoofis xiran.